Телма да ја повлече одлуката за цензурирање на емисијата „КОД“побара ЗНМ

Телевизија Телма да ја повлече одлуката за цензурирање на емисијата „КОД“ на Снежана Лупевска – Созен, побараа од Здружението на новинари (ЗНМ). Оттаму ја повикаа и Владата да престане за затвора очи пред цензурата на медиумите.

– Поразително е за Македонија како земја, за нас како граѓани, да се применува брутална цензура пред очите на македонската јавност. Сопственикот, менаџментот и главниот уредник на Телма, со овој срамен чин, го девалвираат македонскиот устав, со кој се забранува цензура – велат од ЗНМ.

Од ЗНМ додаваат дека Македонија нема да се демократизира и да се интегрира во европското семјество на слободни народи со цензура во медиумите.

– За да биде уште потрагично, ова брутално газење на слободата на медиумите ѝ се случува на Владата која јавно ни вети дека никогаш повеќе нема да дозволи притисоци и цензура во медиумите како во времето на режимот на Груевски. Крајно време е да разбере дека не може да ги затвора очите пред овие брутални форми на цензура во медиумите. Треба веднаш да реагира и да им посочи на медиумските тајкуни дека тие се сопственици на медиумите, но дека новинарската професија е на новинарите и не смеат да се мешаат во нивната работа – велат од Здружението.

Тие ја повикуваат Телма да ја повлече оваа одлука за цензурирање на емисијата и да ги санкционира одговорните за оваа одлука.

– Ако не се спроведат нашите барања ќе ги преземеме сите мерки што ги имаме на располагање за да ги заштитиме правата на нашите колеги, но и правото на јавноста да биде информирана – велат од ЗНМ.

Главниот и одговорен уредник на телевизија Телма, Атанас Кировски, не сакаше да ја коментира одлуката за повлекување на прилогот. Тој само кажа дека ова е сензитивно прашање и посочи дека прво ќе расчистат некои ситуации во редакцијата, па потоа ќе видат што ќе прават понатаму.