Поделена заштитна опрема за новинарите и фоторепортерите! Новинарите добија бесплатна телефонска линија за помош при напади

Здружението на новинарите на Македонија во соработка со Мисијата на ОБСЕ во Скопје подели заштитна опрема и тоа заштитни елеци и капи на новинарите и фоторепортерите кои известуваат од настани од висок ризик.

Заштитната опрема беше обезбедена во рамки на проектот кој го спроведуваа ЗНМ и Мисијата на ОБСЕ во Скопје минатава година, а во наредните неколку недели Здружението ќе се погрижи дел од оваа опрема да заврши во секоја редакција која што ги праќа новинарите да покриваат настани од висок ризик.

На настанот се обрати претседателот на Здружението на новинарите на Македонија, Младен Чадиковски кој изрази благодарност до ОБСЕ за поддршката која му ја дава на ЗНМ во борбата за поголема безбедност на новинарите. „Минатата година беа организирани седум работилници од кои пет во градовите од внатрешноста на државата и две во Скопје, на кои учествуваа над 100 новинари и припадници на полицијата“, истакна Чадиковски. Тој додаде дека покрај обуките, оваа година беше објавен и прирачник кој треба да послужи за подобро меѓусебно разбирање меѓу полицијата и новинарите со цел да има подобро информирана јавност и безбедни новинари на терен. Чадиковски нагласи дека во иднина треба да има и поголема соработка со ОБСЕ бидејќи има уште многу работа со цел да се подобри состојбата со слободата на медиумите и безбедноста на новинарите.

Освен што беше доделена заштитна опрема за новинарите, на настанот беше промовирана и бесплатна телефонска линија за помош при напад на новинари. Таа ќе функционира во наредните две години во рамки на соработката помеѓу Самостојниот синдикат на независни новинари и медиумски работници (ССНМ) и Мисијата на ОБСЕ во Скопје.

Заменик шефот на Мисијата на ОБСЕ во Скопје Џеф Голдстајн рече дека секој новинар кој ќе се соочи со закана или опасност или се најде во непожелна ситуација ќе може да се обрати кај обучените оператори од Синдикатот и ќе добие насоки како да се заштити, и како да го пријави нападот.

„Денеска ви ги претставуваме и безбедносните елеци и заштитни капчиња за новинари кои ги обезбедивме и ги предаваме на ЗНМ да ги дистрибуира до новинарите и редакциите со цел медиумите и репортерите кои излегуваат на настани со висок ризик да бидат барем малку посигурни и јасно обележани дека се претставници на новинарството“, истакна тој.

„Претседателот на ССНМ, Ѕвездан Георгиевски рече дека дел од работничките права на новинарите и медиумските работници е и работата во соодветни услови, без закани и заплашувања. „Клучно на колегите да им овозможиме помош кога ќе се соочат со каков било вид на насилство“, истакна тој и додаде дека при пријавата на нападот на бесплатната телефонска линија (0800-11-011) Синдикатот нема само да го регистрира настанот, туку ќе овозможи и помош поврзана со пријавувањето на насилството до соодветните институции, совети за како да се одбранат во дадената ситуација, како да реагираат на заплашувања итн.- известуваат одznm.org.mk